പിരമിഡ് മാതൃകയില്‍ ആളുകളെ ചേര്‍ക്കുന്ന എല്ലാ ബിസിനസുകളും അന്വേഷിക്കും

Published on Fri, 06/17/2011 - 15:27 ( 3 weeks 2 days ago)

(+)(-) Font Size

   ShareThis

വയനാട്: പിരമിഡ് മാതൃകയില്‍ ആളുകളെ ചേര്‍ക്കുന്ന എല്ലാ ബിസിനസുകളും അനധികൃതമാണെന്ന്  നോര്‍ത്ത് സോണ്‍ എ.ഡി.ജി.പി രാജേഷ് ധവാന്‍ . അതുകൊണ്ട് തന്നെ ബിസാറിന്റെ ആസ്തികളും അനധികൃതമാണെന്നും ഇത്തരം സ്ഥാപനങ്ങള്‍ക്കെതിരെ സംസ്ഥാന വ്യാപകമായി അന്വേഷണം നടക്കുമെന്നും അദ്ദേഹം പറഞ്ഞു. ബിസാര്‍ തട്ടിപ്പുമായി ബന്ധപ്പെട്ട അന്വേഷണത്തിന് വയനാട്ടിലെത്തിയ എ.ഡി.ജി.പി മാധ്യമപ്രവര്‍ത്തകരോട് സംസാരിക്കുകയായിരുന്നു.

ബിസാര്‍ ഗ്രൂപ്പ് ഓഫ് കമ്പനീസിന്റെ ഉടമസ്ഥതയിലുള്ള കോടികളുടെ ആസ്തി അനധികൃതമാണ്. അന്വേഷണത്തിനായി നോര്‍ത്ത് -സൗത്ത് എ.ഡി.ജിപിമാര്‍ സംയുക്തമായാണ് പ്രവര്‍ത്തിക്കുന്നത്. തൃശൂര്‍ മുതല്‍ കാസര്‍കോട് വരെയുള്ള ജില്ലകളുടെ അന്വേഷണ ചുമതല വയനാട് എസ്.പി ജെ.ജയന്തിനാണ്. ഈ ജില്ലകളിലെയും ഗള്‍ഫിലെയും പരാതികള്‍ 9497996974 എന്ന നമ്പറില്‍ അദ്ദേഹത്തെ നേരിട്ടറിയിക്കാം. മണി ചെയിന്‍ കമ്പനികളില്‍ ചേര്‍ന്നവര്‍ക്കെതിരെ നടപടിയുണ്ടാവില്ല. പ്രൊമോട്ടര്‍ക്കും ഏജന്റുമാര്‍ക്കും എതിരെയാണ് നടപടിയുണ്ടാവുകയെന്നും അദ്ദേഹം പറഞ്ഞു.

നെറ്റ്വര്‍ക്ക് മാര്‍ക്കറ്റിങ് തട്ടിപ്പ്

Sunday, September 05, 2010

 

വെഞ്ഞാറമൂട്-കിളിമാനൂര്‍ കേന്ദ്രമാക്കി കോളനികളിലും ഗ്രാമപ്രദേശങ്ങളിലും നെറ്റ്വര്‍ക്ക് മാര്‍ക്കറ്റിങ് ലോബികള്‍ പിടിമുറുക്കുന്നു. 40ല്‍പ്പരം നെറ്റ്വര്‍ക്ക് കമ്പനികളാണു ഇപ്പോള്‍ ഇവിടെ പ്രവര്‍ത്തിക്കുന്നത് . അടുത്തിടെ വെഞ്ഞാറമൂട് മാര്‍ക്കറ്റിലെ നാലു തൊഴിലാളികളില്‍ നിന്നുമാത്രം 50,000 രൂപ കബളിപ്പിച്ചതായും റിപ്പോര്‍ട്ടുണ്ട്. 

നഗരൂര്‍, കാരേറ്റ്, താളിക്കുഴി, മലഞ്ചിറ, കല്ലറ, ഭരതന്നൂര്‍, മേഖലകളിലെ ദളിത് കോളനികള്‍ തുടങ്ങിയ സ്ഥലങ്ങളിലെ സാധാരണക്കാരില്‍ നിന്നു വന്‍തുക നെറ്റ്വര്‍ക്ക് സംഘങ്ങള്‍ തട്ടിയെടുത്തിട്ടുള്ളതായി സൂചന. മാണിക്കല്‍, പുല്ലമ്പാറ, നെല്ലനാട്, വെമ്പായം, പഞ്ചായത്തുകളിലും വാമനപുരം പഞ്ചായത്തിലെ എല്ലാ ഗ്രാമങ്ങളിലും കോളനികളിലും വിവിധ നെറ്റ്വര്‍ക്ക് സംഘങ്ങള്‍ വേരുറപ്പിച്ചിരിക്കുകയാണ്. 

ചതിയില്‍ കുടുങ്ങിയ നൂറുകണക്കിനാളുകള്‍ തങ്ങള്‍ക്കു പറ്റിയ അബദ്ധം പുറത്തുപറയാന്‍ മടിക്കുന്നതും ഇത്തരക്കാര്‍ക്കു സഹായമായി മാറുന്നു. വന്‍ സമ്പാദ്യത്തിനുടമകളാക്കാമെന്ന പ്രചാരണമാണു ലോബി സാധാരണക്കാരനു നല്‍കുന്നത്. ഇവരുടെ സ്റ്റഡി ക്ലാസും വാചക കസര്‍ത്തിലും ഭൂരിഭാഗവും വിശ്വസിക്കും. ഓരോ തവണയും പുസ്തകങ്ങളും ലഘുലേഖകളും സ്റ്റഡി ക്ലാസിനു വരുന്നവര്‍ക്കു നല്‍കുന്നു. ഇപ്പോള്‍ കംപ്യൂട്ടര്‍ ഇന്‍റര്‍നെറ്റ് തുടങ്ങിയ ആധുനിക ഉപകരണങ്ങളുടെ പേരുപറഞ്ഞും ഒരു കൂട്ടര്‍ എത്തുന്നുണ്ട്. കംപ്യൂട്ടര്‍ വെബ്സൈറ്റ് എന്ന പേരുമാത്രം കേട്ടറിവുള്ളവരാണു ഇവരുടെ ലക്ഷ്യം. 

1978ലെ മണി സര്‍ക്കുലേഷന്‍ ആക്റ്റ് പ്രകാരം മണിചെയ്നുകള്‍ കേരളത്തില്‍ നിരോധിക്കപ്പെട്ടപ്പോഴാണു പേര് നെറ്റ്വര്‍ക്ക് മാര്‍ക്കറ്റിങ് എന്ന രൂപത്തില്‍ അവതരിപ്പിക്കുന്നത്. 

ഗ്രാമപ്രദേശങ്ങളിലുള്ള അയല്‍ക്കൂട്ടങ്ങള്‍ കേന്ദ്രീകരിച്ചും തട്ടിപ്പുണ്ട്. സംസ്ഥാന ഉന്നത പൊലീസ് വിജിലന്‍സ് ഉദ്യോഗസ്ഥര്‍ക്കും ജനപ്രതിനിധികള്‍ക്കും ഈ ശൃംഖലകളെക്കുറിച്ചു അറിവുണ്ടായിട്ടും നടപടി മാത്രമില്ലെന്നാണ് ആരോപണം.

നാട്ടിലെ മണിചെയിന്‍ തട്ടിപ്പിന്റെ ഇരകള്‍ ബഹ്‌റൈനിലും

കണ്ണന്‍
മനാമ: നാട്ടില്‍ കോടിക്കണക്കിന് രൂപ സമാഹരിച്ച് നിക്ഷേപകരെ വഞ്ചിച്ചതായി ആരോപിക്കപ്പെടുന്ന നാനോ- എക്‌സല്‍ മണിചെയിന്‍ തട്ടിപ്പിന് ബഹ്‌റൈനിലും ഇരകള്‍. 50- 60 ദിനാര്‍ ശമ്പളക്കാരായ 150ഓളം മലയാളികളാണ് 10 മാസം മുമ്പ് 50 മുതല്‍ 500 ദിനാര്‍ വരെ നിക്ഷേപിച്ച് മണിച്ചെയിനില്‍ കണ്ണികളായത്. ഇതുവരെ ഒരാള്‍ക്കും പണം തിരിച്ചുകിട്ടിയിട്ടില്ല. പലിശക്ക് പണമെടുത്തുപോലും പലരും ഇതില്‍ അംഗങ്ങളായിട്ടുണ്ടത്രേ. നാട്ടില്‍ ഈ മണിച്ചെയിന്‍ തട്ടിപ്പിനെതിരെ ആക്ഷന്‍ കൗണ്‍സിലുകള്‍ നിയമനടപടിക്കൊരുങ്ങുന്നതായി കഴിഞ്ഞദിവസം 'ഗള്‍ഫ് മാധ്യമം' റിപ്പോര്‍ട്ടുചെയ്തിരുന്നു. ഇതറിഞ്ഞാണ് പണം നഷ്ടമായ ബഹ്‌റൈനിലെ മലയാളികള്‍ പരാതിയുമായി രംഗത്തെത്തിയത്.ഇന്റര്‍നെറ്റ് അടക്കമുള്ള സംവിധാനമുപയോഗിച്ച് സാധാരണക്കാരെ വിദഗ്ധമായി കബളിപ്പിച്ചാണ് പണം തട്ടിയതെന്ന് പരാതികള്‍ വ്യക്തമാക്കുന്നു. മനാമയിലെ ഒരു സ്ഥാപനത്തില്‍ ഓഫീസ് ബോയ് ആയ കാഞ്ഞങ്ങാട് സ്വദേശിയാണ് മണി ചെയിന്റെ സംഘാടകനെന്ന് പരാതിക്കാര്‍ പറഞ്ഞു.90 ദിനാര്‍ ഒരുതവണ നിക്ഷേപിച്ചാല്‍ നാലുവര്‍ഷം കൊണ്ട് ഒന്നര ലക്ഷം രൂപ ലഭിക്കുമെന്നാണ് കാസര്‍കോട് സ്വദേശിയായ അക്ബര്‍ അലിയെ വിശ്വസിപ്പിച്ചത്. ചെയിനില്‍ കണ്ണിയായ മറ്റൊരാള്‍ വഴി അക്ബര്‍ 100 ദിനാര്‍ അടച്ചു. അരുണാചല്‍പ്രദേശിലെ പവര്‍ പ്ലാന്റില്‍ ഓഹരി പങ്കാളിത്തം ലഭിക്കുമെന്നായിരുന്നു വാഗ്ദാനം. മാസം തോറും രണ്ടായിരവും മൂവായിരവും രൂപ വീതം ലഭിക്കുമെന്നും ഉറപ്പുനല്‍കിയിരുന്നതായി അക്ബര്‍ പറഞ്ഞു. എന്നാല്‍, ഓരോ തവണ ചോദിക്കുമ്പോഴും ഓരോ അവധി പറഞ്ഞ് ഒഴിയുകയാണ് ചെയ്തത്. ചെയിനിലെ ആര്‍ക്കും പണം തിരിച്ചുകിട്ടിയിട്ടില്ലെന്ന് അക്ബര്‍ പറഞ്ഞു.പണം നല്‍കിയതിന് തെളിവായി ഇന്റര്‍നെറ്റില്‍ പാസ്‌വേഡ് ഉപയോഗിച്ച് തുറക്കാവുന്ന ഒരു സൈറ്റാണ് കാണിച്ചുകൊടുത്തിരുന്നത്. ഇതില്‍ താന്‍ പണം നല്‍കിയതായി പേരു സഹിതം രേഖപ്പെടുത്തിയിട്ടുണ്ടെന്ന് അക്ബര്‍ പറഞ്ഞു. ഈ സൈറ്റ് കാണിച്ചാണ് നിക്ഷേപകരെ വിശ്വസിപ്പിച്ചിരുന്നത്. തന്നെ മറ്റൊരു മലയാളി പറ്റിച്ചതാണെന്നാണ് ഇപ്പോള്‍ കാഞ്ഞങ്ങാട് സ്വദേശി പറയുന്നതെന്ന് അക്ബര്‍ പറഞ്ഞു. രണ്ടുമാസം കഴിഞ്ഞ് പണം കിട്ടുമെന്നും ഇയാള്‍ അറിയിച്ചുവത്രേ. നിക്ഷേപകര്‍ക്ക് ദല്‍ഹിയിലെ ഒരു കസ്റ്റമര്‍ കെയര്‍ നമ്പറും നല്‍കിയിരുന്നു. കമ്പനി പൊട്ടിയിട്ടില്ലെന്നും പണം കിട്ടുമെന്നുമാണ് ഇവിടെനിന്ന് ലഭിച്ച മറുപടിയെന്ന് അക്ബര്‍ പറഞ്ഞു. കാസര്‍കോട് സ്വദേശിയായ ഹനീഫ് 50 ദിനാര്‍ നല്‍കി ചെയിനില്‍ അംഗമാകുകമാത്രമല്ല, സഹോദരനെയും സുഹൃത്തിനെയും ചേര്‍ക്കുകയും ചെയ്തു. കൂടുതല്‍ പേരെ ചേര്‍ത്താല്‍ കമീഷന്‍ ലഭിക്കുമെന്നും നാലുവര്‍ഷത്തേക്ക് മാസം തോറും ആയിരം രൂപ തുടര്‍ച്ചയായി കിട്ടുമെന്നുമായിരുന്നു വാഗ്ദാനം. കേന്ദ്രമന്ത്രി മുല്ലപ്പള്ളി രാമചന്ദ്രനോടൊപ്പം നില്‍ക്കുന്ന ഫോട്ടോയും ഒരു പ്രമുഖ മലയാളപത്രത്തില്‍ 'ഒരു മഗ് നിറയെ സമ്മാനം' എന്ന പേരില്‍ വന്ന പരസ്യവുമൊക്കെ കാട്ടിയായിരുന്നു വിശ്വസിപ്പിച്ചതെന്ന് ഹനീഫ് പറഞ്ഞു. മാത്രമല്ല, കമ്പനിയില്‍ ഓഹരിയുണ്ടെന്നുകാണിക്കുന്ന സര്‍ട്ടിഫിക്കറ്റ് എല്ലാവരുടെയും നാട്ടിലെ വിലാസത്തില്‍ ലഭിക്കുകയും ചെയ്തതായി ഇയാള്‍ പറഞ്ഞു. പണം ചോദിക്കുമ്പോള്‍ സ്‌റ്റേറ്റ് ബാങ്ക് ചെക്കിന്റെ കോപ്പി കാണിച്ച്, ഇതുപോലെ നിങ്ങള്‍ക്കും ചെക്കുവരും എന്നാണ് കാഞ്ഞങ്ങാട് സ്വദേശി അറിയിച്ചിരുന്നത്.നാട്ടില്‍ ഈ മണിച്ചെയിനില്‍ ചേര്‍ന്ന് പണം നഷ്മായവര്‍ ആക്ഷന്‍ കൗണ്‍സില്‍ രൂപവത്കരിച്ചിട്ടുണ്ട്. കേരളത്തില്‍ നിന്നുമാത്രം ഇവര്‍ 500 കോടിയോളം രൂപ ശേഖരിച്ചിട്ടുണ്ടെന്നാണ് റിപ്പോര്‍ട്ട്. കഴിഞ്ഞവര്‍ഷം ഈ കമ്പനിയുടെ 7.04 കോടി രൂപയുടെ നികുതിവെട്ടിപ്പ് പിടികൂടിയിരുന്നു. 103 കോടി രൂപ ടേണോവറുണ്ടായിരുന്ന കമ്പനി ഒരു കോടിയാണ് രേഖകളില്‍ കാണിച്ചിരുന്നത്.തട്ടിപ്പിലൂടെ എത്ര പണം നഷ്ടമായാലും പ്രവാസി മലയാളി സമൂഹം ഒരു പാഠവും പഠിക്കില്ലെന്നതിന്റെ മറ്റൊരു ഉദാഹരമാണ് ഈ മണിച്ചെയിന്‍ തട്ടിപ്പ്. ഒരു രേഖയുമില്ലാതെ ഒരു മാസത്തെ ശമ്പളം മുഴുവന്‍ അപരിചിതരുടെ വാക്കിന്റെ ബലത്തില്‍ മാത്രം നല്‍കി പലമടങ്ങ് പണമുണ്ടാക്കാമെന്ന വ്യാമോഹമാണ് ഇവരെ ഇരകളാക്കുന്നത്.സമീപകാലത്ത് ബഹ്‌റൈനില്‍ നിരവധി നിക്ഷേപ തട്ടിപ്പുകള്‍ സ്വര്‍ണത്തിന്റെയും പണത്തിന്റെയും പേരില്‍ അരങ്ങേറിയിട്ടുണ്ട്. ഇതിന്റെ ഇരകള്‍ ഭൂരിപക്ഷവും മലയാളികളാണ്. ഇവര്‍ തന്നെയാണ് ഓരോ പുതിയ തട്ടിപ്പിന്റെയും 'ഉപഭോക്താക്കളാ'കുന്നത്.

മലബാറില്‍ 82 കോടിയുടെ മണിചെയിന്‍ തട്ടിപ്പ്

കോഴിക്കോട്:മലബാറില്‍ കോടികളുടെ മണിചെയിന്‍ തട്ടിപ്പുനടത്തിയതായി കണ്ടെത്തി. തമിഴ്‌നാട് ആസ്ഥാനമായി പ്രവര്‍ത്തിക്കുന്ന ടൈക്കൂണ്‍ എന്ന കമ്പനിയാണ് 82 കോടിയുടെ തട്ടിപ്പ് നടത്തിയതായി പോലീസ് കണ്ടെത്തിയത്.
കണ്ണൂര്‍, കോഴിക്കോട്, തൃശൂര്‍ ജില്ലകളിലെ ആയിരത്തോളം നിക്ഷേപകരാണ് തട്ടിപ്പിനിരയായത്.
പോലീസിന്റെ ക്രൈം ഡിറ്റാച്ച്‌മെന്റ് നടത്തിയ അന്വേഷണത്തിലാണ് ഇക്കാര്യം തെളിഞ്ഞത്

നെറ്റ് വർക്ക് മാർക്കറ്റിങ്ങിലൂടെ തട്ടിപ്പ്

 MAY 22, 2008

ട്രസ്റ്റിന്റേയും,നെറ്റ് വർക്ക് മാർക്കറ്റിങ്ങിന്റെയും
മറവിൽ കോടികളുടെ തട്ടിപ്പ്


നാഷ്ണൽ ഇൻഷുറൻസ് കമ്പനിയുടെ പ്രീമിയം മറ്റൊരു ട്രസ്റ്റിന്റെ പേരിൽ ഉയർന്ന തുകക്ക് വിതരണം ചെയ്ത് വൻ തട്ടിപ്പ്.ഇത് സാംബന്ധിച്ച് പോലീസ് അന്വേഷണം തുടങ്ങി.സംസ്ഥാനമൊട്ടാകെ കോടിക്കണക്കിന് 
രൂപ ഇങ്ങനെ കമ്പനി പിരിച്ചെടുത്തെന്ന് തട്ടിപ്പിനിരയായവർ പറയുന്നു.


ട്രസ്റ്റിന്റെ ചുമതല വഹിക്കുന്ന മാർക്കറ്റിങ്ങ് കമ്പനിയിലെ ഒരു ഡയറക്ടർ
ഇൻഷുറൻസ് കമ്പനിയുടെ ഉയർന്ന ഉദ്യോഗസ്ഥന്റെ ഭാര്യയാണെന്ന് തട്ടിപ്പിരിരയായവർ പറഞ്ഞു.
സേവനനികുതിയടക്കം 125 രൂപ വരുന്ന ‘ആപത് മിത്ര’ എന്ന പ്രീമിയമാണ് മറ്റാനുകൂല്യങ്ങൾ നൽകുന്നുവെന്ന് പ്രചരിപ്പിച്ച് 1560 രൂപക്ക് വിതരണം ചെയ്യുന്നത്.പ്രീമിയത്തിന് കിട്ടുന്ന താ‍ൽക്കലിക രശീതിയിൽ കാരുണ്യ വെൽഫെയർ ട്രസ്റ്റ്,നെടുമ്പാൾ,തൊട്ടിപ്പാൾ എന്നാണ് അച്ചടിച്ചിരിക്കുന്നത്.ഈ വിലാസത്തിൽ ഒരു സ്ഥാപനം പ്രവർത്തിക്കുന്നില്ലെന്ന് തട്ടിപ്പിനിരയായവരുടെ അന്വേഷണത്തിൽ
തെളിഞ്ഞു.


ട്രസ്റ്റിന്റെ ലഘുലേഖയിൽ ‘സി-വൺ’ ക്ലാസ്സ് അംഗത്വത്തിന് 1560 രൂപയെന്ന് രേഖപ്പെടുത്തിയിട്ടുണ്ട്.എന്നാൽ ഇതുപ്രകാരമുള്ള ആനുകൂല്യങ്ങളൊന്നും ഇവർക്ക് കിട്ടിയിട്ടില്ല.125 രൂപ പ്രീമിയം ഇൻഷുറൻസ് കമ്പനിയിൽ നേരിട്ട് അടച്ചാൽ കിട്ടുന്ന ആനുകൂല്യങ്ങൾ മാത്രമേ കിട്ടിയിട്ടുള്ളൂ.


ട്രസ്റ്റിന്റെ ചുമതലക്കാരായി പ്രവർത്തിക്കുന്നത് തൃശ്ശൂർ കൊക്കാലയിലെ
പി.എസ്.എസ് മാർക്കറ്റിങ്ങ് ഇന്ത്യാ ലിമിറ്റഡിന്റെ ആൾക്കാരാണ്.
ഇതിന്റെ ഡയറക്ടർ ബോർഡിലാണ് ഇൻഷുറൻസ് കമ്പനിയിലെ
ഉദ്യോഗസ്ഥന്റെ ഭാര്യയുള്ളത്.


തൊഴിൽ രഹിതരായവരെ കണ്ടെത്തി അവരെ പ്രവർത്തകരാക്കിയാണ് പണപ്പിരിവ്.ഇപ്രകാരം ചേരുന്നവരോട് ബന്ധുക്കളേയോ കൂട്ടുകാരേയോ ചേർത്താൽ വരുമാനം നൽകാമെന്ന് വാക്ക് നൽകി ഒരു ചങ്ങല/ചെയിൻ 
ബിസിനസ്സ് രൂപപ്പെടുത്തുന്നു.ട്രസ്റ്റിന്റെ ചുമതല വഹിക്കുന്ന സ്വകാര്യ കമ്പനിക്ക് തൃശ്ശൂരിൽ അഡ്മിനിസ്ട്രേറ്റ് ഓഫീസും ചങ്ങനാശ്ശേരി,എടപ്പാൾ,ഒറ്റപ്പാലം എന്നിവിടങ്ങളിൽ ശാഖയും ഉണ്ട്.
കമ്പനി ഈ ബിസിനസ്സിലൂടെ കോടികൾ തട്ടിച്ചതായി പരാതിക്കാർ പറഞ്ഞു.


ഇതുസംബന്ധിച്ച് അന്വേഷണം നടത്താൻ ജില്ലാ പോലീസ് സൂപ്രണ്ട് 
സ്പെഷൽ ബ്രാഞ്ച് പോലീസിനെ ചുമതലപ്പെടുത്തി.